Samferdselsminister Ketil Solvik-Olsen (Frp) foreslår å droppe laurdagsutdelinga av post og opnar for fri konkurranse i postmarknaden.
Samferdselsdepartementet sender no ut på høyring eit framlegg om å gjennomføre EUs tredje postdirektiv, noko som inneber ei full liberalisering av postmarknaden. Samtidig vil samferdselsministeren ha slutt på utdelinga av post på laurdagar.
– Behovet for laurdagsutdeling går stadig nedover. Posten deler ut berre ein firedel så mykje post på laurdagane som dei andre vekedagane, seier Ketil Solvik-Olsen i ei pressemelding.
Utfordrande for avisene
Han ser likevel at det kan skape distribusjonsproblem for ein del aviser om talet på omdelingsdagar blir redusert frå seks til fem.
– Grepa vi tar no, er nødvendige, men vi ønskjer å høyre korleis høyringsinstansane ser på behovet for å halde oppe laurdagsutdelinga av aviser på stader der det ikkje er noko eige avisbodnett, seier Solvik-Olsen.
Staten sparer, ifølgje Solvik-Olsen, rundt 400 millionar kroner i støttekjøp frå Posten Noreg om ordninga med laurdagspost blir avvikla.
Etter det nye lovutkastet mistar òg Posten eineretten på å distribuere brev under 50 gram. I dag er det elles fri konkurranse for pakkar og brev på over 50 gram.
Departementet har òg inkludert eit forslag til ei minimumsregulering av sikre eposttenester. (©NPK)
