Ryfylkemuseet har blitt medlem av LNK. Museumsdirektør Roy Høibo har vore med på landstinget til LNK på Sand og har likt det han har høyrt. Då han blei spurd om museet ville vere med i samanslutninga var han ikkje i tvil.
– Nå er vi med i ein organisasjon som er bevisste når det gjeld språkbruk og det vil vere ei fagleg styrke for arbeidet vårt. Vi er litt på leit etter kva som er samfunnsrolla til museet, og då er det spennande å gå ut over grensene for vanleg museumsarbeid, seier Roi Høibo til lnk.no.
Ryfylkemuseet opna denne veka utstillinga ”Kvitebjørnen”, ei utstilling for barn bygt på ei forteljing av Rasmus Løland. Les meir om utstillinga på museet sine eigne nettsider.
Det er Ryfylkemuseet som skal vidareføre arbeidet med barnelitteratur i Rasmus Løland si and etter at det femårige prosjektet Rasmus Løland-markeringa blir avlsutta dette året. Arbeidet skal vidareførast gjennom eit nasjonalt senter for barne- og ungdomslitteratur.
– Eg trur det er viktig for oss å vere med i LNK med tanke på den jobben vi skal gjere med Løland-senteret. Vi blir med i den nynorske språkstyrkinga, slår Høibo fast.
Han tenker på museet si rolle når det gjeld språkutvikling ikkje bare for barn, men også for innvandrarar.
– Godt språk er viktig viss du skal fungere i samfunnet. Språk er også grunnleggjande for å utvikle demokratiet, sluttar Høibo.
