KS og dei største fagforbunda i kommunesektoren går saman om å jobbe for ein heiltidskultur i kommunesektoren.
Administrerande direktør i kommunesektorens arbeidsgjevarorganisasjon KS, Sigrun Vågeng, leiar i Fagforbundet, Jan Davidsen, leiar i Norsk Sykepleierforbund, Eli Gunhild By og leiar i Delta, Erik Kollerud, møttest tysdag for å underskrive erklæringa «Det store heiltidsvalet».
– Dette er ikkje eit bindande juridisk dokument, men ei viljeserklæring som vi skal ta med oss vidare til det arbeidet som vert gjort lokalt, sa Vågeng under signeringa.
Både KS og arbeidstakarorganisasjonane har sett seg leie på at kommunesektoren er den einaste sektoren der fleirtalet jobbar deltid. I pleie- og omsorgssektoren i kommunane jobbar meir enn to tredelar deltid.
I erklæringa peikar partane på at deltidskulturen i kommunane både svekkjer kvaliteten på tenestene til brukarane, er uheldig for den einskilde tilsette sine løns-, pensjons- og arbeidsvilkår, og at dei mange små stillingsbrøkane gjer det vanskeleg å rekruttere arbeidskraft. (NPK)
