Samrøystes kommunestyre gjekk inn for å melda Skodje inn i Landssamanslutninga av nynorskkommunar (LNK).
– Eg trur det var ei forgløyming i ein sparerunde som gjorde at me i si tid melde oss ut, seier Skodje-ordførar Dag Olav Tennfjord (H).
Han gir æra til forslagsstillar Venstre og leiar i det lokale mållaget Arnstein Sætre for at kommunen på nytt melder seg inn i LNK.
Tennfjord (bildet) er oppvaksen med nynorsk i nynorskkommunen Skodje. Han har bakgrunn frå næringslivet der han har registrert at det er mykje bokmålsbruk, sjølv på Sunnmøre.
– For meg er nynorsken nærmare daglegtalen, og kjem raskare på tunga, seier han.
Tøffe kutt
Kommunen har vore gjennom ein tøff sparerunde dei siste åra, og kutta ti årsverk på kommunehuset, ifølgje Skodje-ordføraren.
Kommunen gjekk med overskot i fjor etter ein ekstra god skatteinngang, og budsjetterer med overskot i år også.
Går for samanslåing
19. mai er det folkerøysting i kommunen om samanslåing. Innbyggjarane får to alternativ: anten ein storkommune på Sunnmøre eller ei samanslåing med Aurskog, Stordal og Norddal. Namnet på den kommunen kan bli Storfjord kommune, etter Storfjorden som dei ligg langs.
Begge alternativa blir nynorskkommunar.
LES SAKA: Blir Ålesund nynorskby?
Skodje er ein pendlarkommune og har opplevd kraftig vekst dei siste åra. 1. januar var det 4620 innbyggjarar i kommunen, 982 fleire enn for ti år sidan.
– Me har fleire sysselsette i andre kommunar enn i eigen kommune. 36 prosent av alle sysselsette jobbar i Ålesund, og mange jobbar òg i Haram, fortel Skodje-ordførar Dag Olav Tennfjord.
Skodjebruene. Foto: Frode Inge Helland/CC BY 2.5-lisens
