Noregs Mållag er skuffa over at statsbudsjettet ikkje sikrar Norsk Ordbok 2014.
Det nynorske ordbokprosjektet får 15,6 millionar kroner på årets statsbudsjett, og det er 680 000 kroner mindre enn det som trengst for å halde framdrifta. Ordboka skal etter tidsplanen vere klar i 2014, jubileumsåret for Grunnloven.
– Noregs Mållag meiner at dette ordbokprosjektet er eit unikt lyft. Det må løyvast nok midlar til at arbeidet vert ferdig til grunnlovsjubileet i 2014, seier Håvard B. Øvregård, leiar i Noregs Mållag i ei pressemelding.
Norsk Ordbok er ei innsamling av nynorske ord som byrja allereie i 1930. Første bandet kom ut først i 1966, og det niande av i alt tolv band kom ut i februar i år.
