Tvang er ikkje løysinga for å få kommunar til å slå seg saman, meiner statsminister Erna Solberg (H). På spørsmål frå Senterpartiet opnar ho likevel for tvang i enkelte tilfelle.
Kommunestrukturen blei teken opp av Sp-leiar Trygve Slagsvold Vedum i Stortingets spørjetime onsdag.
Regjeringa ønskjer større einingar, men argumentasjonen held ikkje, blant anna fordi undersøkingar viser at kvaliteten på tenestene er betre i små enn i store kommunar, sa Vedum.
– Eg har forstått at svaret til Høgre uansett problem er kommunesamanslåing, sa Vedum.
Han viste til at Jan Tore Sanner (H) i Stortinget 5. mars opna for å bruke tvang og ville vite om kommunalministeren er på linje med regjeringa i denne saka.
Solberg kjente seg ikkje igjen i skildringa av utsegna til Sanner. Ho svarde at det er logisk at det i mange små kommunar nesten ikkje er mogleg å ha den breidda og kompetansen som er nødvendig for å gi eit fagleg godt tilbod til innbyggjarane.
– Svaret vårt er ikkje større einingar, men å sette tydelege krav til kvaliteten som skal leverast, sa Solberg.
– Det er ikkje tvang som er løysinga, men å ta det politiske ansvaret breitt i Noreg, la ho til.
Ho understreka at utgangspunktet for regjeringa er fri vilje, med ei avgrensa tvangsmoglegheit for Stortinget i enkelte tilfelle – dersom folkeviljen lokalt støttar det. (©NPK)
