Den påtroppande redaktøren i Syn og Segn, Knut Aastad Bråten, skulle gjerne sett meir nynorsk i Aftenposten, Dagbladet og VG.
Namn: Knut Aastad Bråten
Alder: 37
Yrke: Redaktør i bladet Folkemusikk, påtroppande redaktør i Syn og Segn.
Bruker sommaren til?
Eg har nettopp kome heim etter ein fantastisk pilegrimstur over sju dagar, frå Hedalen stavkyrkje i Sør-Aurdal til St. Tomas-kyrkja på Filefjell. Eg og kjærasten min, Knut Olav Åmås dreg snart på fjellvandring i Oberengadin i Sveits og til Comosjøen i Italia, noko som har vorte ein fin – og fast tradisjon.
Kvifor er språk så viktig?
Fordi språk er tre ting på ein gong: kommunikasjon, identitet og historie.
På kva område kunne nynorsken vore meir synleg?
I dei meiningsberande avisene som Aftenposten, VG og Dagbladet, i næringslivet, men også i skulane. Omkring 75 % av alle elevane som byrjar med nynorsk går over til bokmål i løpet av det 13-årige skuleløpet. Skulen har eit ansvar med å gjera elevane trygge på nynorsk slik at færre skiftar.
Kva trur du skjer med nynorsken etter stortingsvalet til hausten?
Både Høgre og Venstre er kultur- og språkmedvitne parti og er opptekne av nynorsk som eit levande skriftspråk, som kulturell ytringsform og som del av norsk historie. Eg trur ikkje eit eventuelt regjeringsskifte får konsekvensar for nynorsken.
Kvifor nynorsk?
Fordi det er språket mitt. Det er språket eg brukar kvar dag.
