Forfattarane Lars Petter Sveen, Guri Sørumgård Botheim og Sigrid Sørumgård Botheim blir festspeldiktarar på Dei nynorske festspela i 2013.
Språkåret 2013 set også sitt preg på programmet på Festspela, og er ein av grunnane til at festivalen i år gjer ei endring med festspeldiktarrolla. Dei nynorske festspela går av stabelen i Ivar Aasen-tunet og andre stadar i Ørsta og Volda 27 – 30 juni.
Kjartan Fløgstad sette i fjor lys på kor godt det gror blant unge, nynorske forfattarar, noko som endra tradisjonen med ein festspeldiktar.
– I år vil difor publikum møte tre unge forfattarar, mellom anna i møte med Kjartan Fløgstad som var den første festspeldiktaren i 1994, seier programansvarleg Karine Munch i ei pressemeding.
Sveen og søstrene Sørumgård Botheim har merkt seg ut i det litterære landskapet med tydelege stemmer. Lars Petter Sveen er fødd i 1981 og er opphavleg frå Fræna. Han fekk Tarjei Vesaas debutantstipend, Aschehougs debutantstipend og Sunnmørsprisen for debutantromanen Køyre frå Fræna (2008). I 2011 kom romanen Eg kjem tilbake.
Søskenparet Guri Sørumgård Botheim og Sigrid Sørumgård Botheim er frå Lesja. Dei debuterte saman med den leikande romanen Ramstein pensionat i 2009. I 2011 gav dei ut boka Søsken saman med søstrene Kjersti Rognes Solbu og Ingrid Rognes Solbu.
Temaet for årets festspel er Grensealust.
– Dette temaet gir rom for nye og annleis programpostar, utøvarar og arenaer. Festspela blir grenseoverskridande både i høve sjanger og landegrenser, men er sjølvsagt likevel solid forankra i den nynorske skriftkulturen, seier dagleg leiar i Ivar Aasen-tunet, Gaute Øvereng.
