Nynorsk avissenter i Førde opnar i august. Senteret skal drive med utdanning og etterutdanning av nynorskjournalistar.
Arve Sandal er no tilsett som prosjektleiar for senteret, og han tok til i arbeidet sitt denne veka.
– Nynorsk avissenter skal gi eit handslag til lokalavisene som blir redigerte på nynorsk ved å hjelpe med rekrutteringa, men også med å utvikle den digitale lokalavisa, seier Sandal til LNK.no.
– Det er i dag 59 lokalaviser som blir redigerte på nynorsk. Desse avisene produserer store mengder nynorsk tekst kvar veke, og dei er veldig viktige for det nynorske skriftspråket. Vi håper vi kan bidra til desse avisene med råd og med kompetanse.
Startar til hausten
Allereie i april vil senteret derfor lyse ut praktikantstillingar som nynorskjournalistar kan søke på, etter mal av, og i samarbeid med, NRK Nynorsk mediesenter. Det første kullet med nynorskjournalistar tek til på opplæring og praksis i august i år.
Arve Sandal har sjølv vore med i prosjektgruppa som etablerte NRK Nynorsk mediesenter for 10 år sidan, og han ser at eit samarbeid mellom desse to organisasjonane kan gi gode synergiar.
Spark bak
Det er Firda Media AS som står bak Nynorsk avissenter i Førde. Vinjefondet løyvde nyleg 1 million kroner til senteret, og frå før har Sparebankstiftinga og Amedia løyvd ein halv million kronar kvar.
Les også: Satsar på nynorsk avissenter i Førde
At Nynorsk avissenter blir lagt til avisa Firda i Førde meiner Arve Sandal har si naturlege forklaring.
– Firda er den største nynorskavisa i landet, og den einaste av desse som kjem ut kvar dag.
Nynorskfylket Sogn og Fjordane står også i ei særstilling. Medan nynorsken er på tilbakegang i andre fylke, er framleis 97% av alle grunnskulelevane i Sogn og Fjordane nynorskbrukarar, og Sandal peikar på at fylket blir kalla det nynorske grunnfjellet.
At senteret opnar i Språkåret er derimot litt meir av eit tilfelle. Men like fullt gir det eit ekstra spark i baken til det nye avishuset å opne i det året det er 200 år sidan Ivar Aasen vart fødd, seier den nytilsette prosjektleiaren.
