Fleire fredagar og laurdag utover vinteren og våren byr Det Norske Teatret på ei rekkje spesialarrangement med både musikalske godbitar og eit djupdykk i historia til teateret.
Historiske laurdagar er tittelen på ein serie arrangement med forfattaren Alfred Fidjestøl og dramaturg Ola E. Bø. Fidjestøl skriv historia til Det Norske Teatret, og saman med andre gjester vil han og Ola E. Bø sjå nærmare på fortida til teateret.
Det første arrangementet går av stabelen 16. februar. Det har tittelen «Frå Spellaget til teaterslaget. Om starten til Det Norske Teatret. Tre veker seinare er temaet historia til nynorsk dramatikk, medan det norske musikkteatret er temaet den siste historiske laurdagen i mai.
Om lag i same tidsrommet arrangerer teatret det dei kallar «Bikubekveldar i 100». Her kan publikum oppleva gjensyn med musikalske godbitar på Det Norske Teatret opp gjennom åra. Den første musikalske Bikubekvelden går av stabelen 15. februar. Her vil skodespelarane Charlotte Frogner, Ingeborg Sundrehagen Raustøl. Frank Kjosås og Pål Christian Eggen ta publikum med på ei reise i den amerikanske musikalen.
Ein månad seinare kan folk oppleva Heidi Gjermundsen Broch og Lars Klevstrand med fleire tolka Jacques Brei og Edith Piaf. Seinare arrangement byr både på svenske viseskattar, gjensyn med songar frå sukessframsyninga «Bikubesong» og ein kortversjon av musikalen «Next to Normal. (©NPK)
