I samband med Språkåret 2013 arrangerer Nasjonalbiblioteket språkkonkurranse for ungdom.
Nasjonalbiblioteket har invitert alle elevar på 5 – 10 trinn og i vidaregåande skule til å delta i ein konkurranse om språk. Vinnarbidraga blir ein del av Nasjonalbiblioteket si språkutstilling hausten 2013.
– Gjennom konkurransen ynskjer Nasjonalbiblioteket å dokumentere det språklege mangfaldet blant barn og unge i Noregs i dag, seier nasjonalbibliotekar Vigdis Moe Skarstein til uriks.no.
– Dette mangfaldet skal også vise att i utstillinga om språk og identitet som kjem til hausten. No håpar me å få inn mange og kreative bidrag som kan gi oss eit godt bilete av kva språk som blir brukt og korleis, fortel Skarstein.
Ungdommane skal dokumentere dei ulike språka og dialektane dei møter i kvardagen. Språk kan vere alt frå norsk, samisk, teiknspråk og urdu til former som ungdomsspråk, politikarspråk, språk i musikk – eller kroppsspråk.
