Valle kommune i Aust-Agder er ein liten kraftkommune med fallande innbyggjartal. Men ordførar Tarald Myrum (Sp) trur på betre tider.
|
Vi viser deg eit glimt frå ein av kommunane som er med i LNK. Denne gongen: Valle
Nytt frå Valle: Aktuelle lenker: |
– Vi har hatt nedgang i folketalet dei siste 10 åra, men vi jobbar aktivt med å rette opp og auke tilflyttinga til kommunen, seier Myrum.
Valle har mellom anna hatt gåande eit småbruksprosjekt, der ein kartla til saman 100 småbruk som kunne vore aktuelle bu- og arbeidsplassar for folk som har lyst til å busetje seg i kommunen. Prosjektet vart nyleg evaluert, og ordføraren gjev prosjektet status som delvis vellukka.
– Av dei 100 bruka som vart kartlagt, fekk vi tilflytting til fem eller seks av desse. Dei som har busett seg der, livnærer seg av eigne næringsverksemder på garden kombinert med anna arbeid.
Komplisert
Prosjektet kunne hatt eit betre resultat, meiner Myrum, men samstundes har det vore ein nyttig prosess for den vesle kraftkommunen, som ligg midt i hjartet av Setesdal.
– Det er heller ikkje berre enkelt å få hand om desse småbruka, det er mykje som speler inn. Eigarar føler tilknyting til plassen, og vi må ta omsyn til odelslova og ei rekkje slike ting som gjer det vanskeleg.
No må kommunen sjå på andre tiltak som kan lokke folk til kommunen. Valle er ein kommune med god økonomi, og tenestetilbodet til innbyggjarane er jamt godt, meiner ordføraren.
– Vi har gratis barnehage, gode skuletilbod, og vi satsar ein del på kultur og idrett. No skal vi til å byggje ein kunstgrasbane og eit treningssenter.
I sentrum
Valle er ein av fire kommunar som utgjer Setesdalsregionen. Setesdal har lange tradisjonar for kulturbasert næring, og både den materielle og den immaterielle kulturen er gode som Valle og dei andre setesdalskommunane kan og bør smykke seg med, seier ordføraren. Her lever sølv- og gullsmedtradisjonar i beste velgåande, og husflidstradisjonane står sterkt.
– Vi er såpass ubeskjedne at vi seier vi er sentrum i Setesdal, og Setesdalsmuseet ligg i Valle kommune.
Valle kommune er med i Setesdal regionråd, eit politisk samarbeidsorgan mellom kommunane Evje og Hornnes, Bygland, Valle og Bykle. Kommunane har ein del felles utfordringar, og samferdsle er ei av sakene som står øvst på dagsordenen no.
– Utbygging av riksveg 9 frå Kristiansand til Hovden er den store saka nett no.
Regionrådet ønskjer gul midtstripe heile vegen opp til Hovden innan 2023, og målsetjinga no er å få dette på plass i Nasjonal transportplan.
