Høgskolen Stord/Haugesund får ein god målbruk-attest frå Språkrådet.

– De har svært god veksling i både kortare og lengre tekstar, samt på nettsidene dykkar. Også i sosiale medium har de gjort eit godt arbeid for målvekslinga, skriv Språkrådet.

Kvart år rapporter statlege organ til Språkrådet om målbruk i offentleg teneste. I brevet som kom til HSH i starten på februar skriv Språkrådet:

«Høgskolen i Stord/Haugesund gjer framifrå arbeid for å oppfylle krava i mållova. De har svært god veksling i både kortare og lengre tekstar, samt på nettsidene dykkar. Også i sosiale medium har de gjort eit godt arbeid for målvekslinga.

De opplyste i svar på tilbakemeldinga i fjor dagsett 9. mai 2014 at de vekslar jamleg mellom bokmål og nynorsk i dei lengre tekstane dykkar, og at tala difor vil variere noko frå år til år. Vi meiner det er ei god løysing å veksle slik de gjer, for å oppfylle krava i mållova over tid. Vi har tillit til at de held fram med det gode målbruksarbeidet de gjer.»

Men Språkrådet ber HSH og ta eit tak:

Høgskulen har framleis ikkje alle skjema tilgjengelege på begge målformene, og dette må skulen sørgje for snarast råd.