Frå juni av skal all mjølka på Vestlandet – unntatt H-mjølka – marknadsførast på nynorsk, lovar Tine.
Alle dei fire gardane som har vore avbilda på mjølkekartongane til Tine på Vestlandet sidan nyttår, har tekst på bokmål – så nær som skummamjølka. Teksten er på bokmål sjølv om alle dei fire gardane som er presenterte, ligg i nynorskkommunar.Det meinte elevrådsleiar Morten Habbestad ved Stord vidaregåande skule var rart og skreiv brev til Tine og lurte på kvifor ikkje mjølka blir levert på nynorsk.
No har Tine svart Habbestad at dei snur, fortel nettavisa Framtida.no.
Frå juni skal Tine igjen marknadsføre mjølka på nynorsk, seier kommunikasjonssjef Olav Håland i Tine Sør og Tine Vest til avisa.
– Vi har skjønt at mange, også bønder, har ønskt å ha nynorsk på mjølkekartongane. Når vi no skal ha nye kartongar, tenkte vi at vi skulle spørje bøndene sjølve, seier Håland.
Og på Vestlandet har dei utvalde kartongbøndene sagt at dei vil at det skal heite mjølk. Og slik blir det. Dei nye kartongane blir tatt i bruk når det blir tomt for bokmålskartongar utover sommaren. (©NPK)
