11. oktober skal Straumsnes Sokn i Indre Nordmøre røyste over om dei skal halde fram med nynorsk som liturgispråk, eller om dei skal byte til bokmål.
Soknerådsleiar Randi Tøvik og sokneprest Cathrine Grutle kunngjer dette i eit innlegg på nettstaden tingvoll.net.
Frå gamalt av har målformen i Straumsnes sokn vore nynorsk, men dette har endra seg. Straumsnes oppvekstsenter har brukt bokmål som målform dei siste 25 åra, opplyser dei to representantane frå Straumsnes Sokn.
Soknerådet i Straumsnes meiner nå at tida er mogen for å debattere om ein skal halde fram med nynorsk, eller skifte til bokmål.
Bakgrunnen for at dette kjem opp nå, er at det skal innførast ny gudstenesteordning første sundag i advent.
Den andre forklaringa heng saman med utbygginga av kyrkja si trusopplæring i soknet.
– Vi erfarer at barn og unge i bygda slit med å tileigne seg kunnskap og forståing om si eiga kyrkje og tru, når materiell og gudstenester føregår på nynorsk, skriv Tøvik og Grutle.
