På Facebook kan du no bli ven med Arne og Hulda Garborg, viss du vil.
Ekteparet fekk kvar sin personlege profil på Facebook sist veke, og i skrivande stund har Arne 114 vener og Hulda 144. Det er Nasjonalt Garborgsenter som står bak profilane, og det er formidlar Ørjan Johansen som “snakkar” på vegner av dei båe.
– Utgangspunktet for dette er å få litt meir fart på heimesidene og Facebooksida til Nasjonalt Garborgsenter, seier Johansen. – Berre på halvanna veke opplever vi no at profilane har byrja leve sitt eige liv, og vi er ganske overvelda av responsen.
Johansen er ikkje i tvil om at ekteparet Garborg har noko å melde i samfunnsdebatten, også i dag. – Båe to var svært aktive i frigjeringskamp og i språkkamp, og tankegodset deira er like gyldig i dag som då. Arne Garborg er ikkje berre ein viktig forfattar, han er like viktig som filosof, meiner Johansen.
Men det er førebels ikkje dei store eksistensielle spørsmåla folk vil prate med Hulda og Arne om, i alle fall ikkje på Facebook.
– Folk synest først og fremst dette er morosamt, seier Johansen, som heller ikkje legg skjul på at Nasjonalt Garborgsenter beveger seg i ei gråsone når dei no har oppretta personlege profilar for ekteparet. Det er strenge reglar for kven som får opprette personlege profilar på Facebook, og bedrifter og organisasjonar kan til dømes ikkje ha personlege profilar.
– Vi er klar over det. Og samstundes så er det veldig tydeleg for publikum kven som er avsendar her. Det er Garborgsenteret som “er” Arne og Hulda Garborg, og det kjem klart fram på sidene deira. Meir offisielt kan det ikkje bli. Dessutan er det ikkje slik at vi har kuppa identiteten til levande personar, seier Ørjan Johansen, som håper paret får eit langt og aktivt liv på Facebook. – Med kvar sin profil kan Arne og Hulda Garborg no vere med og diskutere aktuelle saker på Nasjonalt Garborgsenter si Facebook-side, også med kvarandre.
