Fylkespolitikarane i Rogaland, Hordaland og Sogn og Fjordane har forhandla fram ein intensjonsavtale om samanslåing, som er ute på høyring med frist 23. november. Ei meiningsmåling bestilt av NRK viser at 72 prosent av dei spurde ønskjer at det blir gjennomført ei folkerøysting før saka blir avgjort.
Men fylkesordførarane meiner det ikkje er nok tid til å få til ei folkerøysting.
– Regjeringa har pålagt oss veldig korte tidsfristar her, så det har noko med den praktiske gjennomføringa å gjere. Men vi trur også breie høyringar kan gi veldig gode svar, seier fylkesordførar Anne Gine Hestetun (Ap) i Hordaland.
Ønsket om ei avstemming er størst blant folk i Sogn og Fjordane, medan folk i Hordaland er minst opptekne av at det blir utført folkerøysting. (©NPK)
