Leiaren i Norsk Oversetterforening, Cecilie Winger, ber språkrådet sin nye direktør, Arnfinn Muruvik Vonen, om å setje språkrøkt på dagsordenen. Ho får støtte av Riksmålsforbundet.

– Aldri før har det norske språket utvikla seg like hurtig, og dét utan at språkbrukarane har tydelege korrigerande rettesnorer, seier Cecilie Winger i eit innlegg i Aftenposten.

Ho peikar på at interessa for språkrøkt var større før.

– Avisene legg ned sine korrekturavdelingar. Lærarane rettar ikkje like flittig. Instansen som skal skilje klint og kveite har falle bort. Det er ikkje lenger noko ideal å skrive korrekt. Alt er lov. Det viktigaste er gleda over å utrykkje seg, held ho fram.

Ho viser til at alle i dag er potensielle kulturprodusentar med eigne bloggar, deltaking i nettdebattar og gjennom sosiale medium.

– Dette skjer gjerne nedrabla på eit haltande norsk, med ein dialektal ortografi som ville gjere Hans Jæger stolt, men som gir mange profesjonelle språkbrukarar rykningar rundt augo og ufrivillige spasmer i raudblyanthanda, slår Winger fast.

Ho får bastant støtte frå Trond Vernegg, som er formann i Riksmålsforbundet. Han vil at staten skal gripe inn og utvide momsfritaket.

– Fritaket frå meirverdiavgifta må bli utvida til e-bøker og digitale medium. Norskundervisninga må styrkast, og staten bør bidra til fleire språkrøkttiltak, meiner Vernegg.

Han oppmodar også andre språkinstansar til å engasjere seg.

– Vi håpar at Arnfinn Muruvik Vonen og Språkrådet, Noregs Mållag og alle andre med interesse for norsk språk vil vere med på eit lyft som må til for å setje språkrøkt på dagsordenen. Det dreier seg om noko så viktig som norsk språk og kultur, sluttar formannen i Riksmålsforbundet.