Tidlegare samferdsleminister Magnhild Meltveit Kleppa og tidlegare landbruks – og matminister Lars Peder Brekk går begge attende til Stortinget.
– Med Slagsvold Vedum og Arnstad i regjering får me ny kraft og nye idear inn i departementa. Meltveit Kleppa og Brekk vil samstundes styrke arbeidet i Stortinget. Med denne totalpakken får me gjennomført endå meir senterpartipolitikk i det viktige året som gjenstår før valet, seier partileiar Liv Signe Narvarsete i ei pressemelding.
Marit Arnstad er tidlegare stortingsrepresentant, parlamentarisk leiar og olje – og energiminister. Dei siste åra har ho jobba som advokat.
– Samferdsel er eit område som berører mange menneske, og eg ser fram til å arbeide med dette viktige feltet som samferdsleminister. Det handlar i bunn og grunn om å ta Noreg i bruk, sørge for at folk kjem seg på arbeid og at næringslivet får frakta varene sine til marknaden, seier ho.
Trygve Slagsvold Vedum er til i dag parlamentarisk leiar, nestleiar i Sp, leiar av programkomiteen og sit på Stortinget. No blir han landbruks – og matminister.
– Norsk landbruk er ei av Noreg sine viktigaste næringar. Bøndene produserer maten vår, skapar verdiar og arbeidsplassar i alle deler av landet. Min viktigaste jobb blir å bidra til at me aukar norsk matproduksjon. Me skal ha meir norsk mat på norske bord, seier Slagsvold Vedum.
