Sola skole blir bokmålsskule frå hausten av.
Trass i at folkerøystinga i mai gav fleirtal for å halde fram med nynorsk som hovudmål på Sola skole, stemte eit fleirtal av politikarane for å endre målform til bokmål då kommunestyret handsama saka sist torsdag.
26 stemte for bokmål, slik instillinga i saka var, medan 15 stemte for å halde på nynorsk som hovudmålform ved rogalandsskulen.
Rogaland Mållag seier til Stavanger Aftenblad at det er skuffande at dei folkevalde stemte imot folket.
– Mållaget synest det er spesielt at dei bruker økonomi som einaste argument i ei tid der signala frå sentralt hald, er at det skal leggast til rette for to målformer. Det er rått av kommunen å gjere dette, sier leiar Else Berit Hattaland.
Les også: Vil endre målform ved Sola skole
Ordførar Ole Ueland (H) seier til avisa at det blir for dyrt for kommunen å halde på nynorsk som hovudmålform ved skulen når så få foreldre vel det som i dag.
– I første klasse var det berre to elevar som ønska nynorsk, og då blir dette veldig ressurskrevjande, seier ordføraren som sjølv stemte for å innføre bokmål som hovudmål frå hausten 2012.
Ifølgje saksutgreiinga frå Sola kommune vil ein spare 800 000 kroner året ved å endre målform på skulen.
