No i juni kjem det nye bondeportrett på mjølkekartongane på Vestlandet – og no blir dei på nynorsk.
Kartongane for lettmjølk, ekstra lett og skumma mjølk skal prydast med bønder frå Fjaler, Hardanger og Stryn. Eit bruk frå Stryn vil dessutan visast på heilmjølkkartongane, men denne teksten vil vere på bokmål. Desse profilane vil vere på kartongane fram til november, skriv Tine i ei pressemelding.
Nynorsk på mjølkekartongane har vore ei sak Noregs Mållag har kjempa for i mange år. I vår tok dessutan elevrådsleiar Morten Habbestad ved Stord vidaregåande skule affære og spurde i brevs form kvifor Tine bruker ”melk” når bøndene som blir presenterte på kartongane på Vestlandet er frå nynorskområde. Han fekk svar frå kommunikasjonssjef Olav Håland i Tine Sør og Tine Vest som lova at no skulle tre av fire søtmjølktypar få nynorsk tekst frå juni.
– Dette er ei gladmelding for alle mjølkedrikkarar på Vestlandet. Språk er viktig for lokal identitet. Det er bra at Tine no vil bruke nynorsk på kartongane, slik bøndene og forbrukarane har bede om, svara ein fornøgd mållaggsleiar Håvard B. Øvregård.
