Dei siste to binda i 12-bindserien Norsk Ordbok skal vere ferdige i 2014. Kva som skjer med ordboka etter det er det ingen som veit.
Det er Klassekampen som i dag set søkelys på prosjektet Norsk Ordbok 2014, som i dag er finansiert med midlar frå Kulturdepartementet, og som ligg som eit forskingsprosjekt under Universitetet i Oslo.
Hovudredaktør for ordboka, Oddrun Grønvik, seier til avisa at det ikkje er nokon som ønskjer at ordbøkene og
Norsk Ordbok 2014 manglar no berre to av tolv bind på å vere ferdige. Nett-ordboka vart dessutan lansert i fjor, og den hadde 6,5 millionar oppslag i mars i år.
Forsvinn ikkje
Det er ikkje slik at alt dette forsvinn etter 2014, men det vil ikkje vere nokon der til å vedlikehalde bokverka og programvaren når prosjektet er slutt, forklarar Oddrun Grønvik.
Viss det ikkje er nokon plan for desse når prosjektet med å få ordbøkene på plass er ferdig neste år, er ho redd dei vil hamne hjå Riksarkivet. Og der er det berre rom for oppbevaring, ikkje drift. Grønvik etterlyser no eit politisk initiativ til å skape eit nasjonalt arkivverk for dei norske språksamlingane.
Tidsavgrensa
Verken Kulturdepartementet eller Universitetet i Oslo kan i dag love midlar til vidare drift etter at prosjektet «Norsk Ordbok. Ordbok over det norske folkemålet og det nynorske skriftmålet» er ferdig i 2014. Kulturdepartementet peiker på at dei har løyva 120 millionar kroner til prosjektet dei siste 12-13 åra, og at dette er løyvingar som er knytt konkret til det tidsavgrensa prosjektet. Etter dette er det Universitetet i Oslo som har ansvar for språksamlinga, seier statssekretær i Kulturdepartementet Kjersti Stenseng (Ap) til Klassekampen si papiravis i dag.
Fungerande instituttleiar ved Institutt for lingvistiske og nordiske studiar (ILN) ved Universitetet i Oslo, Andreas Sveen, seier på si side at ILN er eit stort institutt med mange oppgåver å ta vare på, og mange økonomiske prioriteringar som må takast. Dette er avvegingar som styret må gjere, seier Sveen, og han vil ikkje spå noko om kva dei vil gjere.
