Musikarane Mari Boine, Buffy Sainte-Marie, Moana og Oki vil bidra til å gjera unge medvitne på eige språk og identitet ved å dela av sine eigne erfaringar på seminaret om urfolksspråk under urfolksfestivalen Riddu Riddu i Nord-Troms i dag.
Dei har alle til felles å nytta musikk som formidling av språk og målet er å gjera ungdom interessert i språk, ved å syne korleis ein kan bevara og utvikla språket via musikk, fortel festivalleiar Kirsti Lervoll til nrk.no.
Den samiske musikaren Mari Boine har sjølv tatt viktige språkval og ho syng på samisk når ho er på verdens scenar, medan Cree-indianeren og musikar Buffy Sainte-Marie har utvikla eit eige språkprogram om korleis ein kan bevara språket, som blir nytta av fleire indianerreservat i Kanada.
Samlar samiske språk
I samband med det nasjonale språkåret har Riddu Riddu i samarbeid med Kåfjord Språksenter og Sámi Giellagáldu publisert eit nytt hefte der alle samiske språk blir presenterte. Språkheftet er illustrert av den samiske kunstnaren Anders Sunna (Sápmi/Sverige).
Urfolksfestivalen i Nord Troms, Riddu Riddu, vert i år skipa 10.-14. juli og presenterer eit breidt program innan musikk og kultur for barn og vaksne.
Festivalen er ein internasjonal urfolksfestival, som årleg finn stad i Kåfjord kommune i Nord-Troms. Riddu Riddu omsett til norsk er “liten storm på kysten”. Målet med festivalen er å bringa fram både samisk og annan urfolkskultur.
