Kommunane i landet må busetja til saman 10.000 flyktningar både i år og neste år, ber KS og IMDi.
Akkurat no ventar 5.500 flyktningar med opphaldsløyve på at ein kommune tek imot dei.
– For at alle som ventar i mottaka skal få starta på livet sitt i Noreg, må kommunane ta imot fleire flyktningar i 2014 og 2015, seier direktør Geir Barvik i Integrerings- og mangfaldsdirektoratet (IMDi).
Hittil i år har 324 kommunar sagt ja til totalt 7.600 flyktningar, noko som er ein vesentleg auke samanlikna med tidlegare år. Det er likevel ikkje nok, meiner KS og IMDi.
Berre 126 kommunar har sagt seg villige til å ta imot like mange flyktningar som dei blei bedne om. 27 har sagt nei til å hjelpa personar med opphaldsløyve ut av asylmottak, medan 77 førebels ikkje har bestemt seg. (©NPK)
