I år er det rekordstor søking til høgare utdanning, og særleg mange søkjer seg til lærar- og ingeniørutdanninga.
Tal frå Samordna opptak viser at det i år er 25 prosent fleire søkjarar til ingeniørutdanninga enn i fjor. Samstundes melder Kunnskapsdepartementet at talet på førstevalssøkjarar til lærarutdanninga har auka med 50 prosent dei siste fire åra. Regjeringa har gjennomført fleire kampanjar dei siste åra for å auke interessa for læraryrket, og frå i fjor til i år har talet søkjarar til lærarutdanninga auka med 7,5 prosent. Også føreskulelærarutdanninga har fått eit løft. Der er det i år 22 prosent fleire søkjarar enn i fjor, og det kjem etter tre år med nedgang i talet søkjarar og stadig fleire søknader om dispensasjon frå kravet om pedagogiske leirarar i barnehagane.
Også helsefagutdanninga opplever ein auke i talet på søkjarar, med 6,6 prosent fleire i år enn i fjor, melder Kunndskapsdepartementet.
Innan estetiske fag ser ein derimot at tala peikar nedover, med totalt 7,2 prosent færre søkjrara frå i fjor. Også samfunnsfag, historie og idrett har nedgang i søkermassen, melder forskning.no.
Vekst i heile landet
Framleis er det dei største institusjonane i dei store byane som opplever størst vekst, men også mange av høgskulane utanfor dei store byane har positive tal. Den auka tilstrøyminga til lærestadane i dei store byane som ein såg nokre år, har flata ut, skriv Kunnskapsdepartementet i ei pressemelding.
– Det viser at institusjonane i distrikta har utvikla eit godt studietilbod som søkjarane ønskjer å nytte seg av. Dette er ei riktig og ønska utvikling, seier kunnskapsminister Kristin Halvorsen.
Kvinnene er framleis i fleirtall av søkjarane: 59,2 prosent kvinner mot 40,8 prosent menn.
