Ei samla liste over nynorske læremiddel for minoritetsspråklege vil gjere arbeidet med norskundervisninga lettare, seier rektor ved vaksenopplæringa i Flora, Erik Onstad.
Vox har no samla det som finst av nynorsk materiell i ei nettliste, og sjølv om den framleis er rom for utviding, er fleire av fagområda rimeleg komplette.
– Vi ønskjer ei slik liste velkommen, seier Onstad.
I Flora får dei vel 140 elevane hans opplæring på bokmål. Det skuldast fleire ting, seier Onstad. Mellom anna tilgangen på nynorske læreverk, men òg ein tanke om at mange av asylsøkjarane etter kvart skal vekk frå kommunen og dermed ut i eit samfunn der bokmål dominerer.
– Vi brukte nynorsk ein gong i tida, men opplevde det som lite tenleg så lenge det var så lite materiell tilgjengeleg.
Alltid eit tema
At det no finst ein base med lister over alle ressursar som finst, var han ikkje klar over, men dette er han positiv til og han meiner det gjer ein skilnad. Å kunne gå ein plass og skaffe seg oversikt over det som finst, gjer det også enklare for skulen når dei eventuelt skal vurdere å bruke nynorsk i undervisninga att, meiner rektoren.
– Nynorsk er aldri eit daudt tema hjå oss, og vi er fleire her på skulen som er opptekne av det.
At det kan vere store utfordringar knytte til at innvandrarar i ein nynorskkommune lærer å bruke bokmål som skriftspråk, ser han heilt klart.
– Det er eit dilemma at barna deira lærer og bruker nynorsk, medan foreldra lærer ei anna målform, seier Onstad.
Må vurdere
Han vil likevel ikkje love at ein no går vekk frå bokmålsundervisninga, sjølv om meir nynorsk materiell er kome på bordet. Ei utfordring er til dømes at ein del vaksne som skal ta grunnskuleeksamen, gjerne har grunnutdanninga si på bokmål. Skulen er i tillegg oppteken av å drive undervisning på tvers av grupper og kull, og då meiner Onstad ein vil gjere det vanskeleg for elevane viss ein smeltar saman grupper som har lært seg ulike målformer.
– Men ja, vi vil stadig vurdere om vi skal byrje å bruke nynorsk att.
