122 kommunar har biblioteksjefar utan fagutdanning. Kulturdepartementet vil påleggje dei å finne folk med bibliotekfagleg bakgrunn. KS reagerer sterkt.
I forslaget til ny lov om folkebibliotek går Kulturdepartementet inn for å fjerne høvet til å gje kommunane dispensasjon frå regelen om at biblioteksjefen må ha bibliotekfagleg utdanning. KS går mot dette forslaget.
– Det vil vere eit fullstendig brot på alle styringsprinsipp i forholdet mellom stat og kommune. Staten kan stille krav til kvalitet og innhald i ei teneste, men ikkje korleis kommunane organiserer ho, seier Helge Eide, direktør for interessepolitikk i KS, til Nationen.
Stadig fleire kommunar får biblioteksjefar med fagutdanning, men framleis er det 122 kommunar som ikkje har det. 62 har fått dispensasjon, medan 60 driv ulovleg.
Norsk Bibliotekforening meiner fagkompetanse er viktig, og støttar departementet sitt forslag. (NPK)
