På eit nyopna kjøpesenter i nynorskfylket Sogn og Fjordane er det helst berre bokmål å sjå. Men kundane vil ha nynorsk, melder NRK.
Fleire av kundane NRK har snakka med seier det ville vore naturleg at næringslivet brukte nynorsk i marknadsføringa og meiner det er kjipt å ikkje møte det målet dei er oppvaksne med.
Butikkane skuldar for ein stor del på kjedene dei er ein del av.
Dagleg leiar Kristine Gundersen hjå Cubus seier butikken er sentralstyrt frå Oslo, så då blir alle plakatar på bokmål.
– Vi kan alltids levere eit ønskje, men eg trur ikkje det kjem til å skje noko, seier ho til NRK.
Hjå Intersport fortel dei at dei bruker nynorsk i lokal marknadsføring, men at materiellet som kjem frå kjeda er på bokmål. Det ville blitt dyrt viss kjeda skulle trykt opp alt materiell i to målformer, meiner dagleg leiar Reidar Dvergsdal.
Språkforskar Jan Olav Fretland er skuffa over at butikkane brukar bokmål og seier det viser at butikkane ikkje tek kundane på alvor.
– Det som har vore spesielt i Sogndal er at vi har hatt nokon som har gått føre og vist at dette går an. Det handlar om å vere tøff og krevje ting, då får ein det på nynorsk, seier Fretland.
