Heim Nyhende Mållaget reagerer på Hjemmebane

Mållaget reagerer på Hjemmebane

Sunnmøre Mållag meiner den nye storsatsinga frå NRK som er spelt inn i Ulsteinvik bør heite Heimebane. NRK er på ballen.

– Det er berre naturleg at ein fotballklubb i Ulsteinvik brukar Heimebaneog ikkje Hjemmebane.Det er ingen på Søre Sunnmøre som seier hjemmebane, seier Magnar Storøy, leiar i Sunnmøre Mållag.

På førre styremøte vart lokallaget einige om å gå ut og kritisera NRK for namnevalet på den nye dramasatsinga som i desse dagar vert spelt inn på Høddvoll stadion i Ulsteinvik.

Dramaserien Hjemmebaneer skriven av Johan Fasting og er eit samarbeid mellom NRK og Motlys, som skal visast på norske tv-skjermar til neste år.

– Det handlar om identitet
I tv-serien møter me Helena Mikkelsen (Ane Dahl Torp) som kjem til fotballaget Varg som Noregs første kvinnelege trenar på toppnivå. Handlinga i dei ti episodane dreier seg rundt hennar møte med bygda og den fiktive klubben Varg, som speler heimekampane sine på Tangsrud Arena. John Carew har òg ei leiande rolle. I tillegg har lokale aktørar fått prøva seg i mindre roller.

Mållaget viser til at både Ulsteinvik kommune og fotballaget Hødd nyttar nynorsk. Den lokale klubben fekk i 2013 Målblomen av det lokale mållaget.

Storøy har inntrykk av at innspelinga skapar stoltheit og lokalt engasjement, men håpar NRK endrar nokre bokstavar i tittelen før norske tv-sjåarar vert kjent med det fiktive fotballaget Varg.

– Det handlar om identitet og sidan det skal vere herifrå området er det naturleg med tittelen Heimebane. NRK bør ta omsyn til kvar dei filmar, slik at dei brukar nynorsk i titlar og stadnamn, meiner Storøy.

Nynorsksupporterar
Ordførar i Ulstein Knut Erik Engh (Frp) er sjølve ein ihuga nynorskbrukar, som gler seg over at NRK har lagt si siste dramasatsing til nettopp hans kommune.

– Eg synest generelt at NRK er flinke til å ta vare på nynorsken og lage nynorske produksjonar, så det vert litt dumt å kritisere dei for at denne serien ikkje er på nynorsk.

Hovudrolleinnehavarane snakkar heller ikkje nynorsk, så då vert det litt rart å ha tittel på nynorsk, seier Engh, som likevel synest det hadde vore positivt om NRK valde å endra tittelen til Heimebane.

På Høddvoll, heimebanen til fotballaget Hødd, har dei ikkje gjort seg opp ei endeleg meining om kva serien bør heite, men driftssjef for anlegget Per Arve Moldskred har likevel gjort seg opp nokre tankar:

– Me er no i nynorskland så eg synest det kling betre med heimebane enn hjemmebane. Men slik som eg har forstått det så er dette ein arbeidstittel, så om serien vert heitande det når han kjem på skjermen er eg usikker på, seier Moldskred.

Språksjefen på ballen
Vikarierande språksjef i NRK, Ingvid Bryn, sa tidlegare denne månaden til NRK sine eigne nettsider at dei ville sjå på om Hjemmebane burde heitt Heimebane.

Dramasjef i NRK Ivar Køhn forklarar til Framtida.no at tittelen Hjemmebane har følgt storsatsinga heilt sidan dei byrja å jobba med serien for 3 år sidan.

– Då visste me ikkje kvar me skulle spela inn serien og sidan serien vart skriven på bokmål var det naturleg å bruka Hjemmebane, forklarar Køhn.

Han tykkjer spørsmålet som Mållaget tek opp absolutt er relevant i denne samanhengen og forklarar at dei vurderer saka.

– Me vurderer fram og tilbake. Det er litt som når du har gitt eit barn eit namn, då krev det litt vurdering å endra det, seier dramasjefen, som reknar med at dei kjem med ei avgjerd neste veke.

Køhn har ikkje gjort seg opp nokre meiningar om kva som har størst kommersiell kraft av dei to namna, men ser nokre fordelar med det nynorske namnet.

– Det er kanskje gøyare og meir spanande med Heimebane, fordi det speler på den lokale dialekta, meiner han.

 

NYNORSK INSPIRASJON

Kurstilbod for skular og barnehagar

Arbeidet for å styrkja språkopplæringa i det offentlege er ei prioritert oppgåve for Landssamanslutninga av nynorskkommunar (LNK). Kursa våre blir administrerte og gjennomførte av Fretland...

Språklova: Dette er dei viktige paragrafane for nynorskkommunane

Frå og med 1. januar 2022 er nynorsk og bokmål formelt jamstilte og likeverdige språk på alle samfunnsområde. Formålet med lova er...

Har kommunen din levert høyringssvar om ny opplæringslov?

Arbeidet med ny opplæringslov er svært viktig for nynorskelevane og nynorskkommunane. LNK oppmodar alle medlemskommunane sine om å setja tydelege krav til...

Nytt samarbeid skal styrka nynorsken i barnehagane

Pirion og Sunnfjord kulturskule har laga til ei digital kursrekkje som skal hjelpa til med å styrkja nynorskarbeidet i barnehagane.

Seks fine julebøker på nynorsk

Mange skular og barnehagar bruker adventstida til høgtlesing kvar dag. Her får du tips til fleire gode bøker på nynorsk med god...

Vil gi utviklingsstøtte til fleire nynorske produksjonar i Den kulturelle skulesekken

Kulturtanken, Seanse, Høgskulen i Volda og fleire fylkeskommunar samarbeider om å få meir nynorsk i Den kulturelle skulesekken i ei heilt ny...

MEST LESE

– Den nye opplæringslova er ikkje god nok for nynorskelevane

Fredag 24. mars 2023 la Tonje Brenna fram forslag til ny opplæringslov. Norsk Målungdom synest det er fleire gode framlegg for nynorskelevane, men at...

Målblome til ålesundordførar Eva Vinje Aurdal

– Norske kommunar er viktige språkaktørar, og mellom 356 nyansar av kommunegrått har språket vårt både bøller og bestevener. Midt i det grå står...

LNK om ny opplæringslov: – Stortinget må sikra meir nynorsk i skulen

Nynorskkommunane (LNK) er glad for at regjeringa vil lovfesta at skulen skal ha skriveprogram som støttar nynorsk, men meiner lova må oppdaterast for å...

Mållaget: – Ny opplæringslov forsterkar den digitale læremiddelkrisa for nynorskelevane

– Situasjonen i nynorskklasseromma er alvorleg. Det sit over 73 000 nynorskelevar ved pultane sine og må bruke digitale læringsressursar på feil språk, seier...