Lars Anders Kulbrandstad, Bjarne Øygarden og Olav Veka er tildelt ordbokprisen 2010 frå Norsk faglitterær forfatter- og oversetterforening. Dei får prisen for ei sidemålsordbok på nynorsk. Prisen er på 50.000 kroner.
I grunngjevinga heiter det at forfattarane får prisen mellom anna for at dei gjer noko nytt for bokmålsbrukarar som skal skriva nynorsk.
Det nye går ut på at boka er pedagogisk tilrettelagt på ein ny måte. Til dømes er bokmålsord teke med i sjølve lista, men tydeleg markerte med ein skarp farge og pil til det tilsvarande ordet på nynorsk.
Lars Anders Kulbrandstad, Olav Veka og Bjarne Øygarden har lang røynsle frå skule og lærarutdanning og har gjeve ut ordlister og lærebøker for fleire skuleslag.
– Vi kjenner elevorda og veit kor dei bommar. Dermed kan vi også leggja opp ordlista på ein pedagogisk fornuftig måte, seier Kulbrandstad til nettsida for Høgskulen i Hedmark.
Dei tre forfattarane har også bakgrunn frå normeringsarbeid i Språkrådet, fortel Fagbokforlaget som gjev ut boka. (©NPK)
