Den nynorske nyhende- og debattavisa for unge hadde i 2016 over 475.000 brukarar innom nettsidene sine. Det er ein auke på 85.000 samanlikna med i 2015 – og ny rekord.
I snitt var 12.400 brukarar innom Framtida.no kvar veke – ein auke på 1600 frå året før.
Mobiltrafikken har auka med 87 prosent.
– Dette er svært gledelege tal, og viser at me lagar journalistikk som blir lagt merke til, seier redaktør Svein Olav B. Langåker.
I løpet av vinteren vil Framtida.no skifta publiseringssystem, og koma med ny design på nettsidene som fungerer endå betre på mobil og viser fram meir av innhaldet.
Fleire journalistar
Nettavisa for unge har kontor på Stord og i Oslo, og har no fem journalistar i redaksjonen.
I 2016 publiserte Framtida.no over 2100 artiklar. Den mest lesne artiklar er så langt lese over 34.000 goner.
– Ein aukande del av artiklane våre er eigenproduserte. Me har òg hatt ein auke i debatt- og kommentarartiklar. Meiningsstoffet er eit satsingsområde for oss. Dette blir òg mykje lese, fortel Langåker.
Landssamanslutninga av nynorskkommunar og ABC Startsiden står bak Framtida.no. Nettavisa samarbeider med 20 lokalaviser og fleire andre aviser.
LES OGSÅ: Her er dei mest populære sakene i 2016
Elevar frå Kvinnherad vidaregåande på ein open Me snakkast-debatt i Kvinnherad bibliotek februar 2016 om integrering i regi av biblioteka i Sunnhordland og Framtida.no.
Debattprosjekt og arrangement
Til liks med fleire andre medium blir arrangement eit nytt bein å stå på for Framtida.no.
I 2014 og 2015 samarbeidde Framtida.no med åtte bibliotek, seks skular og to ungdomsråd i Sunnhordland om debattprosjektet Me snakkast. Over 450 ungdommar deltok på debattkurs, og kring 1000 deltok på tolv opne debattar. Debattsamarbeidet har heldt fram i 2016, og Framtida.no vore med på å arrangera fem debattkurs med vel 200 elevar i tre kommunar.
Då Nasjonal bibliotekstrategi blei lagt fram hausten 2015, var debattprosjektet eitt av tre prosjekt for ungdom som blei trekt fram som gode døme. Debattmodellen vår har no blitt ein modell som fleire ønskjer å kopiera, og me planlegg fleire debattkurs og debattar i året som kjem.
Framtida.no har òg bidrege som debattleiar i fleire debattar om kommunereforma, leia ein samtale om Riksteateret si førestilling Samfunnets støtter og vore med som intervjuar i ein turné til fem bibliotek om Syria og flyktningsituasjonen.
