Språkåret 2013 sin språkstafett er klar for Ulvik og Hauge-senteret. Dei som kjem med stafettpinnen er forfattar Ruth Lillegraven og BT-journalist Kjersti Mjør.
Fredag 6. september kjem forfattar Ruth Lillegraven til Den Grøne Kafé for å lesa frå si nye diktsamling Urd. Med seg har ho også journalist Kjersti Mjør i BT.
Ruth Lillegraven frå Granvin debuterte som forfattar i 2005 med diktsamlinga Store stygge dikt, som ifølgje forlaget Tiden er «ein slags rapport frå ei ung kvinnes liv i Oslo, i perioden august – desember 2004». Litteraturmeldarane Tom Egil Hverven og Lisa Kristin Strindberg skreiv i si melding på nrk.no at dikta slett ikkje var stygge, men heller uvanleg velskrivne. Mellom debutboka og den nye diktboka «Urd» har Lillegraven gjeve ut tre barnebøker og ein roman – «Mellom oss» – som også fekk gode meldingar.
Med «Urd» er Lillegraven tilbake på poesisporet. Ramma for dikta er eit gardstun på vestlandet og to kvinner, Seselja og Cecilie, som bur på garden i kvar sin ende av det 20. hundreåret. I Morgenbladet si melding skildrar forfattar (og kritikar) Cornelius Jakhelln boka som eit lite meisterverk. Sindre Ekrheim i BT likar også det han les i «Urd»: «For trass i dei dystre utsynene, er det ei oppdrift og eit løft i dikta. Truleg heng det saman med korleis poeten gestaltar ulike røyster i eit finstemt sanseleg språk.»
Kjersti Mjør frå Kvanndal har bakgrunn som kultur- og nyhendejournalist i NRK og Bergens Tidende, der ho er tilsett per i dag. Mjør har motteke NTB sin språkpris og J. W. Eides journalistpris.
Arrangementet er eit samarbeid mellom Olav H. Hauge-senteret, Ulvik Mållag og Språkåret. Det inngår i arrangementsrekka Språkstafetten som er ei arrangementsrekke som går landet rundt i løpet av Språkåret 2013.
