Stalheim og Ulvik skal forskjønnast og fornyast, og oppskrifta står kunstnarar frå heile verda for.
14 kunstnarar frå heile verda har vore samla i Hardangerregionen i ei veke i sommar for å vurdere områda kring Ulvik og Stalheim. Målet var å samle inspirasjon og idear for korleis dei to landskapsparkane kan utviklast for å gjere områda enno meir attraktive for innbyggjarar og turistar.
– Når ei veke med workshop var ferdig, låg det mange spennande idear på blokkene, seier bygde- og næringsutviklar Caroline Lehmann i Ulvik herad.
Lyssetjing av elver, bruk av fargar i landskapet og utvikling av kunstsentra var mellom nokre av ideane, men Lehman understreker at ingenting er bestemt enno. Kunstnarane har trukke seg tilbake, og først uti august vil Kunsthøgskulen i Bergen presentere dei ideane dei meiner kan løysast. Då byrjar og arbeidet med å sjå kva som kan realiserast reint praktisk og økonomisk.
Så langt har likevel prosjektet gitt noko tilbake til tettstadene i form av nye perspektiv.
– Ein av dei tinga vi ønskte at kunstnarane skulle ta tak i her i Ulvik var eit hus som mange av oss meiner er ganske stygt. Men då sa kunstnarane nei. Dette huset meinte dei hadde ein stor eigenverdi, det treng ikkje forskjønnast. Og no må eg medgje at eg ser noko annleis på huset sjølv og.
– Så huset får stå som det er?
– Det får det, ler Caroline Lehmann.
Colours of the Fjords:
14 kusntnarar, arkitektar, designarar og fotografar skal gi idear til utvikling og forskjønning av Ulvik og Stalheim i Hordaland
Kunstnarane kjem frå mellom anna Japan, Sør-Amerika, Canada, Tyskland og Noreg.
