Mediemållagsleiar Berit Rekve utfordrar journalistar i dameblad og andre magasin til å bruka meir nynorsk.
Namn: Berit Rekve
Alder: 44
Yrke: Kommunikasjonsrådgjevar, leiar for Mediemållaget på fritida
Skal bruke sommaren til: Brukar å vera eit par veker på hytte ved Hardangerfjorden. Elles er det fint å vera heime i hovudstaden om sommaren òg. Lesa og skriva litt. Innrømmer gjerne at det har blitt noko fotball og sykkel på fjernsyn.
Kva er den største utfordringa til nynorsken framover?
Det er mange store utfordringar. Opplæringa kjem alltid først. Dessutan står det att mykje haldningsarbeid i alle sektorar.
Kva må til for at ein skal få meir nynorsk i nasjonale media?
Langsiktig påverknad og haldningarbeid er nok vegen å gå.
Kvifor trur du mange journalistar vegrar seg mot å bruke nynorsk?
Dette har vel mest med redaksjonsspråket der dei arbeider. Men det kan ha med haldningar eller dugleik å gjera. Det er difor vi i MML tilbyr kurs. Journalistutdanningane må ta meir ansvar for det språklege òg.
Kvifor er det så vanskeleg å få nynorsk inn på arenaer som magasinjournalistikk og sportsjournalistikk?
Vel, no vert det skrive om sport på nynorsk i dei lokalavisene som er redigerte på nynorsk, då. Men dette har nok med tradisjonar å gjera.
Kvifor er det så lite nynorsk i dameblada?
Dei er nok svært varsamme med det avstikkande. Tenkjer at stoffet skal vera lett tilgjengeleg og ikkje skapa motstand. Eg utfordrar gjerne både dei og andre til bruka meir nynorsk. Det ser ut til at det er meir positive haldningar hjå lesarane enn før.
