Fylkesmann Lars Sponheim håpar dei hordalandskommunane som så langt ikkje har planar om samanslåing, tar ein ny runde til hausten.
Så langt har tolv kommunar sagt ja til å slå seg saman til fem nye kommunar, men framleis er det 21 kommunar i fylket som enten vil fortsette åleine eller som ikkje har fått napp hos ein passande nabo. Sponheim håpar no at fleire kommunar skal gå for samanslåing, skriv Bergens Tidende.
– Mitt mandat frå Stortinget er å sjå på om det er nødvendig å ta grep utover det som til no har skjedd frivillig. Det kan det bli, men eg håpar at ein del kommunar nyttar hausten til å ta ein ny runde, seier Sponheim. Heimkommunen Ulvik ville gjerne slå seg saman med Eidfjord inst i Hardangerfjorden, men naboen ville halde fram på eiga hand. Det trur ikkje Sponheim er ei haldbar løysing i lengda.
– Før eller sidan må dei inn i ein større heilskap. Det er klart at 900 menneske ikkje kan blokkere for ei naturleg eining, berre fordi dei vil behalde skatteinntektene frå kraftverket sjølv, seier fylkesmannen.
Sponheim er også skuffa over at tre av Bergens nabokommunar sa nei og seier han vil sette seg ned med dei aktuelle ordførarane.
– Vi treng ein storkommune aust for Bergen, seier han. (©NPK)
