– Dei nynorske lokalavisene produserer like mykje nynorsk lesestoff på eitt år som norske forlag gjer til saman på fire år, uttalte direktør Ottar Grepstad i sin årstale.
Han la vekt på at det desse avisene publiserer av tekst kvart år, svarar til meir enn 2100 bøker. Lokalavisene sto i sentrum då Grepstad hadde sin tiande årstale om tilstanden for nynorsk skriftkultur. Heile talen handla om nynorskpressa og støttepolitikken overfor pressa, og det er første gongen tekstmengda i norske aviser er blitt dokumentert.
I 2010 blir 58 aviser redigerte på nynorsk, opplyste Grepstad. Dette er kvar fjerde avis som blir gitt ut i landet. – Avisene er særleg viktige for nynorsk skriftkultur fordi ein stor del av avisene er redigerte på nynorsk og ein liten del av bøkene er skrivne på nynorsk, sa han. Grepstad meiner Noreg treng ein samla, systematisk og målretta mediestøttepolitikk for alle skriftmedia som er på høgd med røynda. Direktøren ved Ivar Aasen-tunet sende denne meldinga til det offentlege utvalet som om få månader legg fram forslag til statlege støttetiltak overfor media
– Mediepolitikken må presiserast ut frå det samfunnsoppdraget pressa har og slå fast at det oppdraget inkluderer styrking av begge skriftkulturane i Noreg.
Han tok til orde for ei støtteordning for journalistisk publisering på papir eller Internett med ein nynorskpott som svarar til 25 % av den samla pressestøtta. Ein slik nynorskpott må kome i tillegg til anna støtte.
– Så enkelt kan Noreg styrkje nynorskpressa utan å svekkje bokmålspressa og utan å tukle med det redaksjonelle sjølvstendet til pressa, sa Grepstad.
Les heile årstalen her.
