Vartdal Plast profilerer seg no konsekvent på nynorsk. – Det skil seg ut blant anna reklame, seier administrasjonssjef Karen Longva Buset.
|
Kvar veke viser vi deg eit glimt Denne veka: Ørsta
Nytt frå Ørsta: Aktuelle lenker: |
Familiebedrifta starta for fire år sidan ein prosess der målet var å bli meir konsekvente brukarar av nynorsk i reklame og marknadsføring.
– Ein hadde ikkje tatt bevisste språklege val før, men sidan bedrifta er i vekst vart det naturleg å tenkje meir også på kva språk me skulle bruke, seier Buset som sjølv er opptatt av språk og drivkrafta i Vartdal Plast for å legge om til nynorsk.
Arbeidet starta med å få nettsidene over til nynorsk, etterkvart vart det også brosjyrar og anna marknadsføringsmateriell, og no seinast reklamen på bilane.
– Me er lokaliserte i Ørsta på Sunnmøre og eg meiner me framstår som meir ekte når me skriv det språket me også snakkar.
Buset meiner også nynorsk reklame fungerer som eit stopp-punkt for mange og skil seg frå anna materiell.
– Eg trur ikkje me kjem til å vinne så mykje på nynorsk reklame, men me taper ikkje på den heller, slår ho fast.
Det er ikkje alle produkta til Vartdal Plast som har fått nynorsk tekst, men i byggevareprodukta er det gjennomført konsekvent.
– Det er jo eit rikare språk, seier Karen Longva Buset.
