Arbeidarpartiet øydelegg ei reform dei eigentleg er for, meiner Venstre-leiar Trine Skei Grande.
Eit fleirtal i Stortinget er for frivillig flytting av kommunegrensene, men dei er ikkje samde om i kor stor grad kommunane skal tvingast til samanslåing viss dei ikkje blir samde innan fristen 1. juni 2016.
I Dagens Næringsliv torsdag skulda Helga Pedersen i Ap kommunalminister Jan Tore Sanner (H) for å truge med tvang, og sa at han ikkje får med seg Ap i bruk av tvang. Sanner svara at utspelet er dobbelkommunikasjon frå Ap, og at reforma skal byggje på lokale prosessar.
No kjem støttepartiet Venstre på banen.
– Det som provoserer i utspelet til Helga Pedersen, er at Ap er i ferd med å torpedere ei veldig viktig reform som dei eigentleg er for. Arbeidarpartiet er så opptekne av å vere mot regjeringa, at dei også blir motstandarar av dei gode sakene, seier Grande til DN. (©NPK)
