Fristen til fylka om å gjere vedtak om regionreforma går ut torsdag. Det er vanskeleg for lokalpolitikarane når det ikkje ligg føre nokon klar plan, meiner Sp.
– Oppgåvefordeling frå stat til fylkesnivå må liggje føre før fylkestinget kan ta endeleg stilling til samanslåing, skriv Hordaland Senterparti i ei pressemelding.
Dei skriv at dei vil vurdere saka på nytt etter at Stortinget har vedteke oppgåvefordelinga til dei nye regionane i juni 2017.
Fylkesmann i Hordaland, Lars Sponheim, sende måndag sitt høyringssvar til fylkeskommunen om regionreforma. Han peiker på at det kan bli vanskeleg å drive strategisk samfunnsutvikling med ei så stor eining som den planlagde Vestlandsregionen, skriv Kommunal Rapport.
Tidlegare har Fylkesmannen i Rogaland vore negativ til ein vestlandsregion, medan Sogn og Fjordane er positiv.
Regjeringa, med kommunal- og moderniseringsminister Jan Tore Sanner (H) i spissen, la i april fram planen om å skape større regionar som også skal ha større ansvar for samfunnsutviklinga.
Løyser regionreforma seg slik regjeringa ønskjer, vil dei 19 noverande fylka verte erstatta med maks 10 regionar. Dei nye regionane skal tre i kraft frå 1. januar 2020. (©NPK)
