Det amerikanske dataprogrammet «Duolingo» skal gjere det muleg for folk flest å vere med å setje om internett til alle dei store verdsspråka. Dei som er med og set om gjer jobben gratis medan dei lærer seg eit nytt språk.
– Det starta med at eg spurde ein av studentane mine «Korleis kan vi få 100 millionar menneske til å setje om internett til alle dei store verdsspråka, gratis?», seier ein av skaparane av «Duolingo», Luis von Ahn, i eit foredrag for nettstaden TED.Svaret blei å tilby brukarane mulegheita til å lære eit nytt språk. «Duolingo» fungerer slik at medan du lærer eit språk, er du med på å setje om internett til nettopp det språket.
Om ein hadde nytta profesjonelle omsetjarar til å setje om internett, hadde det blitt veldig dyrt og tatt veldig lang tid. På denne måten gjer folk jobben gratis.
– Omsetjingsprogramma i dag er ikkje gode nok, og kjem ikkje til å vere det på 15–20 år. Dei gjer mange feil, og då veit ikkje folk om dei kan stole på dei når dei gjer rett, seier von Ahn om kvifor han trur «Duolingo» er den mest effektive måten å setje om internett på.
«Duolingo» er ikkje lansert ennå. Til nå finst det bare ein prøveversjon og folk må stå på venteliste for å få vere med.
«Crowdsourcing», eller dugnad, om du vil, er den nye måten å få realisert store prosjekt på. Nettleksikonet «Wikipedia» og digitaliseringa av bøker for Google gjennom inntasting av såkalla «CAPTCHA»-kodar er døme på dette. Veldig mange menneske går saman og gjer litt av jobben kvar, og det kjem til nytte for alle som bruker internett.
Les heile saka om «Duolingo» på NRK.no.
