Telemarksforsking meiner det er realistisk at Voss, Vik og Aurland kan bli ein fylkeskryssande storkommune.
NRK.no fortel at forskingsinstituttet har sett på samanslåing av dei tre kommunane som eit tilleggsalternativ til dei alternativa Sogn regionråd har greidd ut.
Prosjektansvarleg i Telemarksforsking Bent Aslak Brandtzæg meiner ei samanslåing av dei tre kommunane mellom anna vil kunne gi økonomisk gevinst på tenester og samfunnsutvikling.
– Ein del av dette er knytt til den framtidige samferdslesituasjonen i regionen. Viss ein får Vikafjellstunnel og oppgradering av E16, så blir regionen tettare knytt saman. Du vil i større grad få ein felles bu- og arbeidsmarknad, seier Brandtzæg til NRK.no.
Ordførar i Vik Olav Turvoll (Sp) er ikkje framand for å vurdere forslaget som eit alternativ. Kommunen vurderer også ei samanslåing som er i samsvar med intensjonsavtalen med Sogn regionråd. Her ser ein på moglegheita for ein storkommune i Sogn. (©NPK)
