I nytt forslag til læreplan i norsk føreslår ein å byrje med sidemål i 2. klasse. – For uforpliktande, seier leiar i Norsk Målungdom, Vebjørn Sture.
I den nye læreplanen føreslår ein at alle elevar skal ha snakka om dialekt, bokmål og nynorsk før dei går ut av 2. trinn på barneskulen. Ein skal òg ha lytta og snakka om tekstar på bokmål og nynorsk i løpet av dei første to skuleåra.
Les forslaget til læreplan her.
Vebjørn Sture, er godt nøgd med at ein byrjar så tidleg, men er likevel skeptisk til om læreplanen held mål.
– Det blir veldig uforpliktande, og veldig avhengig av kvar lærar, seier han, til Framtida.no
Målungdomen ønskjer skriving i sidemålet mykje tidlegare, og vil at elevane skal begynne med dette seinast på 4. trinn.
– Dette vil føra til at elevar i ulike klassar og på ulike skular kjem til å verta vurderte på heilt ulikt grunnlag. For dei med samvitsfulle og profesjonelle lærarar, vil sidemålskunnskapen telja ein god del. For dei som har uvelvillig innstilte lærarar, som me diverre veit at det finst litt for mange av, vil sidemålskunnskapen telja så godt som ingenting. Dette luktar ansvarsfråskriving.
Sture reagerer også på at ein ynskjer ei endring i vurderinga av elevane. I forslaget er det lagt opp til tre alternativ for vurdering.
– Det er alternativ 1 som er «lungebrannen» her, medan alternativ 2 og 3 er ulike former for influensa. Alternativ 3 har fordelen av ein eigen karakter, og alternativ 2 fordelen av at sidemålsopplæringa også held fram i VG3. Det er utruleg synd at dei to tinga skal setjast opp mot kvarandre på den måten, seier han til Framtida.no.
