Peer Gynt – stemnet er ei av dei sterkaste merkevarene i Nord – Fron, seier administrerande direktør Eli Blakstad i Peer Gynt AS.
I 1928 vart det første Peer Gynt – stemnet arrangert, deretter vart det arrangert eit nytt i 1932 og eit i 1967. Etter det har stemnet vore årvisst.
– Det var heilt klart eit gjennomslag for stemnet då me fekk utandørsførestillinga om Peer Gynt ved Gålåvatnet i 1989. Då tok stemnet kunsten ut i naturen, det er noko me framleis arbeider med, seier Blakstad.
I tillegg til at nasjonaleposet blir sett opp med Gudbrandsdalsnaturen som kulisse blir det også arrangert klassisk konsert i Rondane med Peer Gynt Kammerorkester og danseførestilling i Fyrajuvet under det 10 dagar lange Peer Gynt – stemnet. I fjor hadde danseførestillinga TidarÅ med FRIKAR danse company premiere i Fyrajuvet, til sommaren kjem dei attende.
– Stemnet er variert. Me klarer å kombinere scenekunst, dans og musikk, seier Eli Blakstad som også legg vekt på at Peer Gynt framleis er like aktuell i dag som tidlegare.
Peer er ein unnsluntrar som unggår dei vanskelege spørsmåla i livet. Dette dramaet kan godt brukast som eit bakteppe for aktuelle diskusjonar også i dag. Ei kvinne frå Bangladesh meinte Peer Gynt var like aktuell i likestillingsdebatten som Et dukkehjem, fortel Blakstad. Dette er også noko av bakgrunnen for Peer Gynt – akademiet som skal bli ein arena for refleksjon, og der ein kan diskutere avgjerande spørsmål i livet.
Les meir om Peer Gynt – stemnet og Nord – Fron i neste nummer av LNK-avisa.
