NDLA varslar at dei vil setje i gong strakstiltak for å sikre kvaliteten på nynorsktekstane i det digitale læremiddelet.
I eit brev til Nynorsk Forum gjer dei greie for kva tiltak dei vil setje i verk, og her slår dei samstundes fast at alt berande lærestoff på www.ndla.no vil vere språkvaska og kvalitetssikra på båe målformer til skulestart hausten 2010.
Nasjonal Digital Læringsarena (NDLA) vart i vinter kritisert av organisasjonane i Nynorsk Forum for å ha for dårleg språk i lærestoffet sitt. Noregs Mållag viste mellom anna til at nettstaden bruker ord som ikkje finst i ordboka.
No lovar NDLA å bruke inntil 2 millionar kroner på å språkvaske alle sidene. Dei har og etablert nye rutinar for kvalitetssikring av fagstoffet og språket det blir ført i.
– Det seier mykje om alvoret og dimensjonane i denne saka at styret i NDLA svarar så tydeleg og så klart erkjenner at dei har svært mykje å rette opp, seier sekretær for Nynorsk Forum og direktør for Nynorsk kultursentrum, Ottar Grepstad.
Nynorsk Forum vil no sende brev til Kunnskapsdepartementet og gjere greie for sitt overordna syn på saka. Her vil punkt som kvalitet på læremiddel, skulane sin rett til å velje læremiddel, kvalitetssikring av språk og omfang av nynorsk i digitale læremiddel vere vesentlege, seier Grepstad.
