Ragnhild Bjørge (36) blir ny språksjef i NRK.
– Eg gler meg veldig til å bygge opp jobben som språksjef i NRK. Eg brenn for godt språk og god språkrøkt, seier Ragnhild Bjørge til NRK.
Ragnhild Bjørge har arbeidd som journalist i NRK dei siste seks åra, mesteparten av tida i nyhendeavdelinga på Marienlyst der ho blant anna har vore reporter, planleggar, vaktsjef og programleiar i Dagsnytt. Dei siste åra har ho også vore språkkontakt i nyhendeavdelinga.
– Både leiarar og medarbeiderar er engasjerte i språkbruk. Det gjeld både kva som er rett språk og ikkje, og det gjeld arbeidet med å frigjere seg frå kjeldespråk. Eg meiner det er ein styrke for NRK at det er gitt rom for dialektbruk, seier Bjørge til NRK.
Bjørge har blant anna master i nynorsk skriftkultur og mellomfag i statsvitenskap. Ho har vore politisk rådgjevar i Noregs Mållag og var tidleg i sin karriere dagleg leiar i Norsk Målungdom. Ho har også vore praktikant ved Nynorsk Mediesenter i Førde og arbeida ved distriktskontora i Sogn og Fjordane og Hordaland.
Les også: NRK vil ha eigen språksjef
– Bjørge vil kunne organisere språkarbeidet i NRK på ein god måte. Ho skal jobbe opp mot språkstyret og finne gode løysingar for god språkrøkt i alle redaksjonar over heile landet, seier distriktsdirektør Grethe Gynnild-Johnsen. Bjørge er fagleg sterk, engasjert og vil kunne skape entusiasme og merksemd rundt språk i og utanfor NRK, seier distriktsdirektør Grethe Gynnild-Johnsen.
Det var 27 søkjarar til stillinga som språksjef i NRK. Bjørge startar i stillinga på seinhausten.
