Den norske bokbyen i Fjærland er 20 år i år.
Bokbyen i sognebygda vart opna i 1996 av dåverande kulturminister Åse Kleveland. Bokbyen utvikla seg raskt til å bli ein turistattraksjon, og det norske språket fekk eit nytt ord.
Gamle bokskattar
Definisjonen på ein bokby er at det er ein liten by eller ei bygd der det er samla mange bokutsal på eit lite område. I Fjærland har ein 10 utsal på 300 meter, til saman om lag 150.000 brukte bøker. Antikvariske bøker og samleobjekt frå mange generasjonar er å få tak i. Ein finn òg ganske vanlege bøker.
Skape liv i bygda
Bokbyen vart starta for å gje ny aktivitet og sikra eksisterande arbeidsplassar i Fjærland. Ideen vart henta frå Hay-on-Wye i Wales. Tanken var ganske ukjent, det fanst berre sju bokbyar i Europa før Den norske bokbyen vart etablert ved Sognefjorden.
Seinare har også Bokbyen ved Skagerrak i Tvedestrand kome til. Frankrike, Tyskland, Skottland, England, Sverige, Portugal og Australia har fått sine bokbyar.
Feiring i boknatta
Sjølve jubileumsarrangementet i Fjærland er lagt til Boknatta 25. juni. Det blir både kanapear og sprudlevatn, men også mange kulturelle innslag. Mellom attraksjonane er Ove Røsbak og Henning Sommerro. Dei skal opptre saman i Fjærland kyrkje med tekstar av Hans Børli, Alf Prøysen, Edvard Hoem og Røsbak. Hilde Kvalvaag og Brynjulf Jung Tjønn samtalar om det å reisa, mentalt og fysisk. I tillegg kjem mellom anna Ragnar Hovland og Tove Bakke. (©NPK)
