Ein finn mange tilfelle av distriktspolitikk på Facebook. Eit av dei er gruppa Folkens – Fløtt heim, ut i distriktan og lag liv.
Det er Mats Aleksander Mikalsen som står bak ei av mange grupper som tek opp distriktspolitiske spørsmål. På ei veke hadde gruppa fått 1000 tilhengarar frå heile landet, og det stig framleis.
– Eg tenkte at vener kunne invitere vener og kanskje nokre til, men eg fekk ein respons eg aldri hadde drøymt om, seier Mikalsen til Kommunal – og regionaldepartementet sine nettsider.
– Sosiale medium er ein sterk marknadsføringskanal og ein utmerkt kanal for å treffe mine målgrupper. Det gjeld blant anna sentralisert, urban ungdom, poengterer Mikalsen.
Sjølv er han interessert i regionalpolitikk og fryktar at det i framtida ikkje skal vere noko lokalsamfunn å flytte heim igjen til.
– Politikk er mi store interesse, og for meg er politikk distriktsutvikling, seier Mikalsen.
