Etter å ha fått kritikk frå olje- og energiminister Terje Riis-Johansen (Sp) går Statoil bort frå kravet om å bruka engelsk i Noreg.
Tidlegare i vår blei underleverandørane til selskapet bedne om å bruka engelsk i staden for norsk i kontakten med selskapet.
Dette reagerte Språkrådet skarpt på og tok saka opp med Olje- og energidepartementet. Etter det Bergens Tidende kjenner til, skal fleire verksemder og tilsette i selskapet også har reagert på kravet om berre å bruka engelsk.
Men no snur altså selskapet. Etter at departementet tok tak i saka, skriv selskapet at det vil bruka norsk i Noreg og engelsk der det verkar nødvendig og rimeleg.
– Vi vil kommunisera på begge språka, sånn at vi tar omsyn til dei som har gjeve uttrykk for at dei ønskjer kommunikasjon på norsk, seier informasjonsdirektør Jannik Lindbæk i Statoil.
Språkdirektør Sylfest Lomheim tolkar dette dit at Statoil ASA vil bruka meir norsk i Noreg, men vil følgje nøye med på språkbruken i statskonsernet framover.
– Vi kjem til å sjå etter at dei bruker norsk der det er rimeleg og praktisk. Om dei ikkje praktiserer dette, vil vi minne om det statsråden har skrive, seier språkdirektøren til Bergens Tidende. (©NPK)
