Norsk kulturminnefond vil ha inn fleire søknader frå privatpersonar og organisasjonar som treng pengar til bevaring av kulturminne.
Tilskotsordninga er eit lågterskeltilbod til private eigarar av verneverdige kulturminne. Også frivillige lag og organisasjonar, enten dei eig kulturminna sjølv eller forvaltar dei på vegner av andre, kan søke.
– Samarbeid med eigarar er det viktigaste vi gjer for å nå det nasjonale målet om å minimere tapet av verneverdige kulturminne, seier Simen Bjørgen, direktør i Norsk kulturminnefond, i ei pressemelding.
Kulturminnefondet støttar tiltak på alle faste kulturminne, som for eksempel buplassar, hus og bygningar, hageanlegg og bevaring av kulturlandskap. Kulturminne er ikkje aldersbestemt, og kan vere frå både fjern og nær fortid.
– Vi ser at framtidig bruk av kulturminne er avgjerande for bevaring. Når eigarane lykkast i å vareta kulturhistoriske verdiar, resulterer dette som regel i næringsutvikling som gir lønsemd og dermed moglegheiter for å halde kulturminnet i stand også i framtida, seier Bjørgen.
Norsk kulturminnefond er eit statleg forvaltningsorgan med formål om å styrkje arbeidet med, og bevare verneverdige og freda kulturminne. Sidan oppstarten i 2003, har Kulturminnefondet delt ut nærmare 500 millionar kroner. (©NPK)
