I Akershus, Oslo og Rogaland har det vore størst befolkningsauke i tettstadene dei to siste åra, medan det i Hedmark og Telemark har vore minst vekst i tettstadbefolkninga.
Nesten 80 prosent av Noregs befolkning budde i tettstader ved nyttår. Folketalet i tettstader har auka med 3,2 prosent i perioden 2009–2011. Tettstadarealet auka i same tidsrom med 2,7 prosent.
I alt 3.900.000 av oss, eller nær 80 prosent av den totale befolkninga, budde i til saman 936 tettstader per 1. januar 2011, går det fram av tal frå Statistisk sentralbyrå. Folketalet i tettstader auka med 120.000, eller 3,2 prosent, i perioden 2009–2011.
Tettstadarealet auka med 64 kvadratkilometer, eller 2,7 prosent, i dette tidsrommet. Befolkninga i tettstader auka med 425.000, eller 12 prosent, medan tettstadarealet auka med 210 kvadratkilometer, eller 10 prosent, i perioden 2002–2011.
Størst vekst i talet på busette i tettstader i perioden var det i fylka Akershus, Oslo og Rogaland, med om lag 4 prosent.
Minst vekst i tettstadbefolkninga var det i fylka Hedmark og Telemark med i underkant av 2 prosent. Til samanlikning auka det totale folketalet i Noreg i perioden 2009–2011 med 2,5 prosent.
Spreiddbygde strok hadde ein svak nedgang i befolkninga i same periode med 2.100 personar, eller 0,2 prosent, av befolkninga i slike område. Ved nyttår budde det i overkant av 1.000.000 personar i spreiddbygde strok i Noreg. (NPK)
